[美食車。豪園小食] 海旁的$1 雞翼

「美食車先導計劃」開始左一段時間, 今日先知, 原來有一個美食車營運點係設係中環海濱活動空間。由公司行過去只係10分鐘, 當然就要去睇睇啦。餐車會輪流轉位, 大約兩星期就會搬去另一個點, 都幾有趣。

今日係中環海濱活動空間擺檔嘅係 豪園小食 。主打廣東/潮州滋味, 都幾有本土感。

對我黎講最開心係有 炸一字雞翼, $1/枝, 真係抵得好緊要, 而且仲要好好食! 多肉汁又脆, 食起黎又超級方便, 真係好正。(要留意每人最少要買8枝, 如果買多過8枝就要另買一杯飲品, 而且最多只可以買16枝)

另一個推薦係 檸茶BB。下, 檸茶都可以推薦? 係! 唔好睇小呢杯外表普通的檸茶, 內涵一啲都唔普通, 入面充滿左剁碎檸檬, 唔洗篤都有極香檸檬味, 配上濃厚茶底, 真心覺得係必飲。

是否西多士 是否西多士呢, 就真係要食過先知啦。呢個多士係中環限定, 當豪園小食架車搬去另一個營運點時, 就唔會再供應嚕。鬆脆西多士中間包住左海鮮同沙律醬, 係一個極佳嘅小食。如果可以下午茶黎食, 就真係perfect池。

同場加影仲有柔軟嘅燒魷魚同牛腩麵魚蛋麵, 都很不錯。食食下先知, 豪園小食原來係來源至黃大仙的豪園麵家。以麵起家的豪園, 所有麵條都係自家製做的, 非常有heart呢。

雖然企係度食有點點不方便 (餐車之上其實都有小小吧枱可以用, 但空間唔多), 但難得可以係海邊吹住海風睇住摩天輪食野, 都真係別有一番好風味。豪園小食餐車會係中環海濱經營至3月19號, 之後就搬去灣仔啦。中環友要食就快手啦。

想追蹤美食車的位址可以去APPLE STORE 或GOOGLE PLAY STORE下載APP, 就方便得多啦。